0
كما وعدتكم بجديد الشاعر الفراعنة
أترككم مع الإبداع
هذي قصيدة لخالد بن مدعث والتي أسندها على الفراعنة :
هيه يا قلب المحبة ما بقى في العين عبرة
..........كل يوم والعيون من الغرام يسيل ماها
لين صار الجفن عنده من غزير الدمع خبرة"
..........وانت شيخ حنوة الاضلاع مسجون وراها
ما تعدى لو طلع راس الجمل مع سم الابرة"
..........في ضلوعي بكيتك ما غيري بيسمع بكاها
يا سجين الجوف تدري مالنا في الحب قدرة"
..........سنة للناس مدري وش قداها من خطاها
الهوى كانه خطيّة ما حدٍ قد جاب عذره"
..........والهوى كانه مباحي علّة صعب دواها
اصبر ويلقى طويل الصبر في الايام صبره"
..........كم صبور جاب صبره حاجة عسر لقاها
يا فؤادي صرت لك حزمة هشيم وانت جمرة"
..........كل ما هب الهوى بأطرافها يكبر سناها
والهوى تاليه فرقا والنوى لو طال عمره"
..........ما نسينا العهد وجروحه براها او ما براها
دام عهده في يميني والنجوم اتجيب خبره"
..........نعتبرها غايبة عنا وحجّتها معاها
لو درت وش صار فينا ما خذت عن نجد سفره"
..........يا هبايب علميها كم شقيّ في رجاها
منبت النوّار عقبه يذبح العسّاس دهره"
..........حالف ما عاد ينبت في ديار ما وطاها
المولّع عقبها ينقل على الكفين قبره"
..........ميّس ما عاد تشتاله عظامه من جفاها
عقبها راع المطايا ما دعى للعد نشره"
..........والظوامي صافي الميراد ما يقطع ظماها
جادل حده زمانه عن روابي نجد مكره"
..........والليالي ما تخلي مستريح في ذراها
صوب دار مالها من قسمة الاجواد بذرة"
..........النجايب سبعة اشهر ما يجن ارض نصاها
البحور تحول دونه والفجوج الجرد عسره"
..........والذيابة تحتري مع سكة الطرقي عشاها
فرّق الله شمل من فرق ثنين كان خشره"
..........في غرام وفي علوم يشهد الوالي علاها
ما يحق الواحد مالقح النخلة بتمرة"
..........من سقاها واحتماها لأثمرت يقطف جناها
كنت اقول يموت رجل ما نفع نفسه بعمره"
..........ثم قلت يموت رجل حدّ نفسه منتهاها
كني الرحال وسنين الليالي الشهب بكرة"
..........شلت زادي في خباها والحيايا في خباها
يا عنود الصيد لو آخذ من الايام عبرة"
..........كان روحي في يمينك حكم ربي ما رماها
جيت لك غيث تهادى وانت يمي جيت حسرة"
..........يوم علّقت السحابة سقت رجلك من سماها
لك شهر من غبت عنا والهوى يا طول شهره"
..........ذكريها يالثريا وانشديها وش بلاها
العرب قد قالوا انه مع توالي العج مطرة"
..........واعذابي كانها عجت والاخرى في قفاها
والهوى لا زان قاده للولايف سلك مكرة"
..........مير وحي من عرفته والهوى يلعن ثواها
آتصبر وآتحرى رجعة الغيّاب بكرة"
..........والزمان بعيد والايام من يلحق مداها
يا نديبي هاك خط من دموع العين حبره"
..........الرسالة غير (ناصر) لا حدٍ يبحث خفاها
صاحبٍ بين النشامى بالمراجل بان ذكره"
..........السبيعي لا تعزوى عزوة العود احتماها
يا ابن فارس شف صحيبك عيّب الجبّار كسره"
..........ان بكى قال اقطعوها وان شكى منها كواها
يا ابن فارس كان عندك في عميق الجرح دبرة"
..........لا تخلي صاحبك ينقل جروح ما قواها
حالتي حالة فقير يوم قام يسدّ فقره"
..........ما لقى له غير عين تدفق من الفقر ماها
وهذا رد أبو فارس مع ملاحظة آخر القصيدة :
علم والا حلم يا قلبٍ حشاه عويد سمرة
..........كنّ من بين اضلعه جنّيّةٍ تصفق يداها
قلبي اللي من سطر مابه تقل غاشيه خمرة"
..........يوم فيه قلوب شق الثوب ما كدّر كراها
قم يمانع فوق وجْناً من خيار الجيش ضمْرة"
..........وصف شقرا ربّها دون المليحة ما نحاها
بنت هرشٍ كنّ قرن العامريّة وصف وبْره"
..........وكنّّ نيبان السباع الضارية تنهش حفاها
ابن مدعث لجل عينه نقرن الحجّة بعمرة"
..........ابن من همّل مجاهيمه على البصرة وجاها
لا تحسّر دام باقي في صليب الراس قُطْرة"
..........يا ابن مدعث والضلوع العوج داها في رداها
لا وربي ما نقلنا السيف ابو حدّين بطْرة"
..........كود لعيون الصبيّ الدوسري نطعم شباها
يا ابن مدعث ما نلومك في الهوى لو شفت عُزْرة"
..........الهوى قبلك غداله بأمّةٍ بِيْضٍ لحاها
ما أطال النوم في عمر الفتى المكتوب فترة"
..........والسهر ما قصّر اعمارٍ كتب ربي بقاها
زمّ نفسك والهوى سكرتْه عن مليون سكرة"
..........لو حصل منها سلامة وين تسلم من نماها
نركض وتركض وما نجمع بأيادينا نِخَسْره"
..........الليالي دوْل والدنيا رحول اللي مشاها
تالي الدنيا يخالد حفرةٍ في جوف حفرة"
..........نطرد الدنيا ولا نفرق خطاها من قداها
هيّ وش هي؟ هيّ من هي؟ هي ثمانٍ كان عشرة"
..........البواشق قرنست وام الكباير ذا جزاها
مير اخذ من دنيتك (صاحب) و(بارودة) و(خفرة)"
..........زبدة الدنيا ثلاثٍ عانها واترك سواها
اترك اللي يطرد الدنيا يبي عزٍّ وشهرة"
..........كيف يبغاها تعزّه وهْي ما عزّت ضناها
يا ابن مدعث لو عرا جسمك بمشلحها تغمره"
..........لا لقت غيرك تِحَذْفك حذفة الجاهل حصاها
رايعت من لا بنى من شامخ البيتين وكره"
..........ولعوزت كل ابن حرٍّ بأوّل الهجرة عطاها
وصفنا وصف ثْمَرَه والزين فلاّحٍ بغمره"
..........يعتنيها وان حداه الجوع ما اسرع ما كلاها
يا ابن مدعث لا رعت بين الجهام السود عفره"
..........حاجةٍ تقضي عقب سن الصبا وش هو قضاها؟
ابعد الله دار من يبعد ثنينٍ كان قصرة"
..........امّة لا شافت الشمل اجتمع جاها بلاها
لا سقى الله فيضةٍ فيها سمين الصيد قُعْرة"
..........كل دِحْلٍ واجهوا به حيّةٍ تلحس جماها
عزّتي للي بقى بينه وبين الموت شعْره"
..........روحه اقرب للمنايا السود من حذفة عصاها
طال وقتك يا ابن مدعث بين لا تطريه واطْره"
..........حيّ ابو مجناك وين الله شلع بك في فضاها؟
شدّها من خدّها واقطر على المركاز صفْرة"
..........والحمى ما احدٍ حماها كان ربّي ما حماها
انت مثل اللي يدوّر للوسايد وسط خُبْرة"
..........وخُبْرة الروض ايتحمّل ما يجيه اللي رباها
نقطن الواد المخيف ونضرب البيد أمّ جُفْرة"
..........لعنبو بعض البني يا ما لحقنا من هواها
ما لقينا من يقول: ابطى بهاك السيل كُبْره"
..........طالت المدّة وخالد في رجا دورة رحاها
الوجيه البيض سفْرة والوجيه السود ودْرة"
..........وجثّةٍ ما سرّت الصاحب على ويش انغذاها؟
هيه ياللي في فؤادك من عسام الوقت نفْرة"
..........طالت الدعوى ولا ادري وش حجَلها من قطاها؟
آخر المنصوب فتحة وآخر المجرور كسْرة"
..........حطّها نذرٍ عليّ انّي لأليّن لك قساها
واجمع اوّل حرف من كل بيت تلقى بيت شطْره"
..........عقّب اللي مزنته ما يروي العطشان ماها
أرجو التركيز في الحرف الأول من كل بيت
إذا جمعتم كل أول حرف من كل أول بيت في القصيدة
وبنفس الترتيب والتسلسل
تعطيكم الشطر الثاني من آخر بيت في القصيدة
بوزنه وبحره وقافيته وصياغته
وانظروا إليها معي:
أي كل حرف كبير في البداية إذا جمعناه في سطر واحد فانه يأتي هكذا
ع ق ق ب ا ل ل ي م ز ن ت ه م ا ي ر و ي ا ل ع ط ش ا ن م ا ه ا
أي بالضبط وبنفس الترتيب تعطينا الحكمة التي في البيت الأخير هكذا:
عقب اللي مزنته ما يروي العطشان ماها
فعلاً شاعر مبدع حد الإبهار !!
أبو زيد
يحيييييكم
