عدد ردود الموضوع : 5

[fasool]

السلام عليكم و رحمة الله و بركاته

اسعد الله جميع اوقاتكم

اليوم اعرض لكم الحلقه الثانيه من مسلسل ابداعات البدر



اتمنى لكم الاستمتاع




القصيده الأولى

قصيده وطنيه خالده


فوق هام السحب


فوق هام السحب وان كنتي ثرى

فوق عالي الشهب يااغلى ثرى

مجدك لقدام وامجادك ورى

وان حكى فيك حسادك ترى

مادارينا بهرج حسادك ابد

انتي مامثلك في هالدنياء بلد

والله مامثلك في هالدنياء بلد


من على الرمضى مشى حافي القدم.. يستاهلك

ومن سقى غرسك عرق دمعن ودم.. يستاهلك

ومن رعى صحراء الضمى ابل وغنم.. يستاهلك

حنا هلك يا دارنا برد وهجير *** حنا هلك يادارنا وخيرك كثير


من دعاء لله وبشرعه حكم.. يستاهلك

ومن رفع راسك على كل الامم.. يستاهلك

ومن ثنى بالسيف دونك والقلم.. يستاهلك

نستاهلك يادرنا حنا هلك *** انتي سواد اعيوننا شعب وملك

فوق هام السحب وان كنتي ثرى

فوق عالي الشهب يااغلى ثرى




القصيده الثانيه

مســاويك


تجلس عجوز .. في اول السوق ..

عند الابواب وتحت الشبابيك ..

وتبيع السوالف ..

وأغصان المساويك ..

ومايخالف .. لو باعتني الحكي ..

الحكي غالي هــ الايام ..

مريتها .. ابي الكلام ..

قلت : ياخاله أنا ..

ان نسوني الناس .. زعلت ..

وان اذكروني الناس .. زعلت ..

مدري وش فيني!

صمتي وحروفي مبعثره ..

ضحكت وقالت :

لو عدلت .. سلمت قلب وحنجره ..

الصحيح ..

ماعطيتها فلوس على العتب ..

وماريحتني من التعب ..

قمت وعلى عيوني غباش ..

مدت لي مسواك طري ..

وقالت بلاش ..

ان كانت سنونك نظاف ..

حطه في جيبك ياولدي ..

يجلي محانيك الرهاف ..

من كل أحساس ردي ..




القصيده الثالثه

الجـريـده


الجريده

أدري وش سرّ الجريده

به أحد يقطع وريده

و ينزف أخبارٍ جديده

لأجل نقراها الصباح

***
دنيا مكتوبة في ورق

دنيا من دمّ و عَرَق

دنيا مجنونه أرق ..

و همّ

انسرق .. احترق ..

المهم ..

كلّها أخبارٍ سعيده

و احنا نقراها الصباح

***
لو طبعنا صفحة ما فيها خبر

لا حروف و لا صور

صفحه يملاها البياض

و صفحه تملانا بياض

ما يعكّرها الحبر

كانت الصفحه الوحيده

اللي أقراها الصباح

في الجريده




القصيده الرابعه

حـــزين



ليه أحس إني وأنا اشوفك حزين ..... قلبي الليله بهمي ممتلي


كانها الفرقى طلبتك حاجتين ..... لا تعلمني ولا تكذب علي


خلني ما بين شكي واليقين ..... السكوت رضاي عنك وزعلي


باكر اللي خافي لازم يبين ..... والوعد بلقى مكانك به خلي


انتظرني ليلة او ليلتين ..... لين ما يقفي السحاب وينجلي


ولا طويت الياس بذرف دمعتين ..... للهوى الغالي وبا وادع هلي


صاحبي بموت من كثر الحنين..

خلني بختار لحظة مقتلي




القصيده الخامسه

صوتك يناديني



صوتك يناديني .. يناديني تِذكَّر

تِذكَّر الحلم الصَّغير

و جدار مِن طين و حصير

و قمرا ورا الَّليل الضَّرير .. عِلى الغدير

لا هبَّت النِسمه .. تِكسَّر

تِذكَّر ..


جيتي مِن النَّسيان .. و مِن كلَّ الزَّمان

الَّلي مضى .. و الَّلي تغيَّر

صوتك يناديني .. يناديني تِذكَّر

* * * * * *
ناديتي .. خانتني السَّنين الَّلي مِضت .. راحت

و ناديت ما كِنَّ السَّنين الَّلي مِضت .. راحت

كِنَّا إفترقنا البارحه

و البارحه صارت عمر

ليله أبد عيَّت تمرَّ

يا جمرةَ الشَّوق الخفي

نسيت أنا

و جرحِك وفيَّ

* * * * * *
ريَّانةَ العود

نادي الَّليالي تعود

بشوقِ الهوى .. بوعود

وجهي الَّلي ضيَّعته زمان

في عيونك السود


يا البسمةَ العذبه ..

عنك الصبر كِذبه

و فيك العمر موعود

إشتقت للحلم الصَّغير ..

و جدار مِن طين و حصير

و قمرا ورا الَّليل الضَّرير .. عِلى الغدير

وإن هبَّت النِسمه .. تِكسَّر

تِذكَّر ..





القصيده السادسه

المزهـريــه



لا أنتي ورده

و لا قلبي مزهريه من خزف ..

صدفه وحده جمعتنا

شوفي وشلون الصدف ..

التقينا فـي مدينه.. وفرقتنا ألف ميناء..

أغفري للريح .. والموج .. والسفينه ..

كانت الرحله .. حـزينـه ...

للأســف


كنت أحلم لما ناديتك بسـافر ..

مع عيونك في شعاع الفجر باكر..

والله أعلم اني صادق..

كنت أحلم اني عاشق..

لا أخاف .. و لا أضيع .. و لا أفارق ..

ويش أقول غير أني .. أسف .. ويش أقول !؟

أنا خانتني العواصـف .. والفصـول ..


آه.. ياتعب المسافر..

آه ياتعب المسافر..

في أراضي الجرح آآه.. في دمع المحاجـر..

مالهذا الحزن آخر

..او لهذا الجرح آخر..


يا شمسي الأخيره ..

في اللحظه الأخيره..

أنا لي كلمه أخيره ..

أغفري لي ..

أبتسامي .. قبل جرحي..

حاولي تنسـي ..

كلامي .. قبل صمتي..

و لو رضيتي ياأعـز الناس .. انتي..

لا انتي ورده ولا قلبي مزهريه من خزف




نلتقي في الحلقه الثالثه

[optimist]

إقتباس

انتي مامثلك في هالدنياء بلد

ياخي والله مع كثر الأغاني الوطنية إلا إن هذي غيييييييييييير

ما كنت أدري إنها لمهندس الكلمة

إقتباس

وتبيع السوالف ..

وأغصان المساويك ..

هذي توني سمعتها من كم يوم نزلت رابطها على الفيس بوك يسلم لسانه وتسلم يدك فصوول

إقتباس

الجريده

أدري وش  سرّ الجريده

صراحة قصيدة رائعة ومعبرة مرة

لكن ما تتغنى ذي يعني كيف الحاااااال يا كاظم؟

.......................................

واللي يبي يستمتع بهذي القصائد يسمعها <<<< جو ثاني


لاهنت يا فصوول

في انتظار الثالثة

[true]

اختيار موفق ويعطيك العافية

[fasool]

يا هلا و سهلا بالجميع

[عبدالله]

ابداع x ابداع

[أبو زيد]

تعقيب على مشاركة , fasool ,الوقت 25/3/2010 - 00:58:

القصيده الثانيه

مســاويك


تجلس عجوز .. في اول السوق ..

عند الابواب وتحت الشبابيك ..

وتبيع السوالف ..

وأغصان المساويك ..

ومايخالف .. لو باعتني الحكي ..

الحكي غالي هــ الايام ..

مريتها .. ابي الكلام ..

قلت : ياخاله أنا ..

ان نسوني الناس .. زعلت ..

وان اذكروني الناس .. زعلت ..

مدري وش فيني!

صمتي وحروفي مبعثره ..

ضحكت وقالت :

لو عدلت .. سلمت قلب وحنجره ..

الصحيح ..

ماعطيتها فلوس على العتب ..

وماريحتني من التعب ..

قمت وعلى عيوني غباش ..

مدت لي مسواك طري ..

وقالت بلاش ..

ان كانت سنونك نظاف ..

حطه في جيبك ياولدي ..

يجلي محانيك الرهاف ..

من كل أحساس ردي ..

أحببت أن أسمعكموها من لسان البدر مباشرة :

تحياتي لك فصول